هو انا كدة ابقى جاهله ومتخلفه ولا محتاجه دكتور نفساني

بسم الله الرحمن الرحيم
ازيكم ياعدولات
بالله عليكم انا عايزة كل اللى تقرا مشكلتى ترد عليه ضرورى انا محتجالكم قوى انا تعبانه خالص
ونفسيتى زفت .يابنات انا بكلم نفسي ليل ونهار عشان مش عارفه حل

ساامحونى انى برغى كتير
الموضوع ومافيه انى عشت واتربيت فى الارياف وزى اى بنت فى الفلاحين بعرف اعمل كل حاجه كنس ومسح وطبخ وعجن وخبز وكنت بحلب البقرة وبنزل الارض ازرع واحصد وبعمل كل شى .
فكان حلمى وانا صغيرة انى متجوزش فى الفلاحين لانى اتبهدلت كتير وتعبت كنت عايزة ارتاح
من اللى شوفته
وعرفت جوزى وحبينا بعض هو اهله مش فلاحين يعنى معندهمش ارض ولااى حاجه عيشتهم
مرتاحه .فكنت مبسوطة قوى
طبعا هو عارفنى لاننا جيران وعارفه انى فلاحه وفلاحه اصيله .وعارف انى متبهدله فى العيشه .وكان بيقولى هعوضك عن كل شى .كان بيهون عليه كل شى
هو كان جارنا .وكل يوم كان بيجى عندنا كل يوم .ماكنش بيطلع من عندنا خالص .
عرفنا وعرف كل حاجه عننا وكان عايش عنندنا بياكل ويشرب اكتر الاوقات
وامى كانت بتعزة قوى كانت بتشيل له نصيبه من الاكل حتى لو كان نصيبها
المهم عشنا كدة اكتر من تلات سنين لحد مخلص كليه وانا طبعا فاشله اخدت دبلوم
وبعدين جت له سفريه فى بلاد برة .اشتغل وحوش وعمل شقته واحنا عمرنا ماطلبنا
ماطلبنا منه شى وطول فترة الخطوبه عمرة ماجبلى شى كنت بقول معهوش دا بيجهز
شقته وكان صحابى بيسالونى خطيبك جابلك ايه كنت بطلع من اللبس اللى محوشاه
وافرجهم عليه واقول هو اللى جاب اللبس دة .
هو بقا كان حنين مع اخواتى وبيحبهم وبيحترم ابويا وبيحب عيلتى وامى كان بيحبها قوى
المهم هو رجع من السعوديه واتجوزنا على طول وبعد سبوع الفرح..
اتغير خالص خالص مابقاش يروح عند اهلى ولا بقا بيحب يشوفهم لما يجولى بقا بيهرب منهم
ولما اضايف اهلى كان يزعل ويلوى بوزه بس انا كنت ملاحظه التغير دة من يوم مارجع من السفر ..خلاص بقا هو اشتغل وبقا بيسافر وبقا الباش مهندش مبقناش قد المقام .
ومن يوميها وانا حاسه انه بقا يستعر من اهلى مع ان اهلى احسن من فى الاصل وكل شى
واغنى منه بس فلاحين .واتغير معايا قوى قوى بقابيعاملنى على انى جاهله ومش بفهم حاجه
كل شويه يقولى وانتى ايش فهمك هو انتى بتفهمى هو انتى بتعرفى .
ودايما كلامه كدة معايا
وطبعا انا سافرت معاه بس انا زى ما انا بتكلم فلاحى وعيشتى عاديه وشكلى عادى
هوضح يعنى مبتكلمش وبقول باة ومباش بتكلم عادى وعايشه عادى يعنى بعمل الاكل اللى بعرفه اللى متعودين عليه انا وهو برضه ماهو من بلدى وعايش فى الفلاحين معايا
وشكلى عادى يعني مش بحط مكياج وكدة لانى عمرى ماحطيته ومبعرفش احطه بحس
انى مش محتجاه شكلى حلو ووشى حلو عشان كدة مش بحط
بصراحه جربت كذا مرة كان بيعايب عليه ويقولى امسحى اللى حطاه انا بحبك من غير حاجه على
وشك .ولبسى عادى خالص .
هو عايزنى اتغير بيقولى انسي البلد واللى فيها واتغير ى بيقولى انسى العيشه اللى كنتى عايشها .
طب ازاى مرة واحدة انسي كل شى كدة واتغير ازاى .هو اتغير خالص من يوم ماسافر بعد الفرح مانزل مصر بيقولى عايزانى انزل الفلاحين واتبهدل واشوف الناس المتخلفه دى
مش نازل .انا اللي بنزل مصر من وقت لتانى .
المهم انه من بقاله برة خمس سنين مااتصل على ابويا وامى غير مرة او مرتين ومعتش بيسال عليهم خالص ولا بيعبرهم ودايما اهلى بيسالوا ويقولولى خليه يكلمنا هو وحشنا ونفسنا
نسمع صوته ولا بيعبرهم .بقا بيغلط فيهم وفى امى وابويا وبقا بيعايب على اخواتى وعلى عيلتى .اللي مكنش يحلم يناسبها بس دة كان قبل مايبقى سيادة الباش مهندش
ا
انا متجوزة من خمس سنين وعايشه معاه بما يرضى الله حامدة ربنا على كل شى .
مش بطلب منه اى شى يعنى بلبس اللى عندى وباكل الموجود وعايشه مش بقوله عايزة لبس غير كل سنه واكتر عبال ما اشترى شى جديد ولا بقوله عايزة اروح كوافير ولا حاجه الكوافيرات
هنا غاليه قوى ولا ليه اى طلبات ولاعايزة احدث تليفون ولا عايزة اعمل شعرى ولا حاجه انا
بسرح شعرى و نلفه واشبكه بالدبوس وخلاص .
هو بقا ولابيعبر عمرة ماقلى خدى اشترى حاجه ولا قالى مرة نفسك فى ايه مع انى محرومه
من حاجات كتير نفسي البس زى الناس واروح الكوافير وافرد شعري نفسى اعيش زى الناس
لما بنزل مصر الناس مش بتصدق انى جايه من الخارج بيقولولى انتى عامله زى اللى جايه من السجن انتى ليه كدة .
هو عايزنى اتغير طب ازاى وهو مش بيدينى مصروف شخصى ليه ولا بيهتم بيه
بيقولى انتى عايزة ايه انتى مش بتاكلى وتشربى عايزة ايه .هو اللي هشتغل بيه هنضيعه على الكوافيرت واللبس احنا هنا متغربين عشان نصرف الفلوس ولا عشان نحوش حاجه
معا انه والله لما يحلق لازم يعمل مسك لوشه وحمام زيت لشعره واحلى واغلى تليفونات
وكل يوم يشحن كروت وانا بيزلنى لما يشحن ليه كل شهر
ودايما محسسنى انه عمل فيه معروف انه اتجوزنى انتى متجوزة مهندس فى شركه وعايشه
فى الخارج وانى مش بفهم فى اى شى بيقولى احمدى ربنا على النعمه اللى انتى فيها
انتى عايزة ايه من الدنيا انتى اتجوزتى وخلفتى عاية ايه تانى ايه هيا احلامك ولا حاجه
خلاص ربى عيالك وخلاص
مع كل اللى حصل واللى قولته بيروح الشغل ويجي يقولى شوفت النهاردة واحدة لبس كذا وعمله فى وشها كذا وبيقعد يتكلم على البنات ولبسها ومكياجها .وكل ماارد واقوله هاتلى
زيهم يرد ويقولى انتى مش زيهم متبصيش لحد
طب هو مين اللى بيبص .انا ولا انتا .
دايما محسسنى انى متخلفه ومش بفهم .
ولما بنطلع مع بعض لازم يتشيك على الاخر ماهو بيشترى لنفسه احسن لبس ولما يروح يشترى
معايا بيختار لى لبس مش حلو ورخيص ولما اتكلم يقولى هو دة يامفيش .ولازم يزعقلى كدا
قدام الناس ويشخط ويمشى بعيد عنى .انا بحس انه خايف الناس تقول بقا ياختى الشيك العسل دة متجوز دى والله دة اللى بحسه

قولولى اعمل ايه وياترى العيب فى مين
نفسى حد يدينى نصيحه صح انا تعبانه خالص
انا نفسي اتغير واعيش حياتى بس انا شخصيتى ضعيفه ومبعرفش اعمل حاجه ولاحتى بعرف
اشترى لنفسى لبس
بالله عليكوا ترودوا لو برسالة
وانا اسفه انى طولت عليكم وانى بتكلم كدة انا بتكلم بكل عفويه ومش بعرف ازوق الكلام