مستنى إيه ؟؟ أنا قلت خلاص
راح فين ياناس زمن الاخلاص
فجــأة لاقيتــك بتصــرخ فيــا
وتقول انتى.. طالبة الخلاص
انا اللى ياما اتحملت عشانك
كنت بلسـم ودوا لأحـزانك
دلوقت خلاص راحـت أيامى
بكـره تتمنى ترجـع لمكانك
ياللى ظلمت القلب تعالى
اسمع بقى خلتنى ف حاله
مين يتصور ان دا يجـرى
وابقى ف نظرك مجرد حالة
حالة ايه دى مجرد قصــة
عشت فيها وكنت انا حـاســة
انك يــوم راح تغــدر بيـــا
درس واخدته فى اول حصة
بس ياريت الدرس فهمته
قـلت حرام يمكن ظلمتــه
اديته فرصة وقلت اشوف
ياريت من تانى ماكلمته
كلمة ورا كلمة .. فى حكاية
زادت قسوته .. قلت كفاية
كان نفسى اروح ولا ارجعشى
طب اعمل إيه ياللى معايا؟
الجرح زاد ومش قادرة
حكاياته غريبة ونادرة
مين ع الظلم ياناس يقدر
حياتى خلاص بقت فاترة
يارب وحـدك عالم بالحـال
تهدى لى نفسى واصبح عال
ومن أحــزانى تخلينى افوق
سبـحانك يا مغيـر الأحـوال
